Gue Udah Capek Ngomong Bae!

Sore itu aye dengan ringan nyaba rumehnye cang Mursyid, paman atu-atunya yang masing idup, di Pulo Jahe, Pedurenan, minggir dikit deket Cakung. Udah lame banget dah rasenye enggak kongkow ame encang yang peduli banget ame pendidikan. Maklum keluarge besar kerjaannye enggak jauh dari sekolahan. Ujan turunnya enggak pake rem, kayak aye kalo mau ngambil honor. Deres banget kayak ditumpahin dari langit, ampe jalanan aje enggak keliatan. Tapi yang namanye juga kangen ame petuah-petitih dari encang,jadi aye jabanin aje. Kali ini aye enggak mau sosialisasi Quipper School nih, yang ade aye malah disumpel bujuran ame sang Mursyid. Mohon dipersorry dah buat teteh Petra ame pasukannye, ye.

Sampe dirumeh cang Mursyid, yang punye lagi enggak dirumeh,ngendon di warung mpok Hindun, ngupi! Kebiasaannye emang begitu, sore apalagi ujan-ujan, ngupi sama rebusan singkong, sekalian ngepulin asep lisong.

“Tumbenan luh, Mat. Ade kabar ape nyaba dimari?”, cang Mursyid emang orang selalu tembak langsung nggak pake tedeng aling-aling, to the point.

“Yah, encang pan pengganti babeh aye. Jadi, pantes aje kan kalo aye maen dimari”, aye sih jawab sekenenye juga tetep sopan dah. aye susul cang Mursyid ke warung kopinya mpok Hindun di sudut pasar. Yah, pasar itu dulu yang mulain kong Sabeni, erabnye yang lebar dibuat pasar sebagian yang akhirnya diambil alih pemerintah kota, tanpa ganti rugi apalagi ganti untung.

“ngupi, Mat. Dun, bikinin satu buat ponakan gue, biase jangan manis-manis!” tereak cang Mursyid. Aye cuman nganggukin kepale, cang Mursyid udah paham dah demenan aye soal kopi.

Cang Mursyid emang beda dengan encang-encang aye yang udeh pade almarhum. Cang Mursyid yang tamatan Mesir, peduli banget ame pendidikan. Buktinye, cang Mursyid ngediriin sekolahan alias madrasah untuk anak-anak disekitar Pulo Jahe yang punye nasib kurang beruntung. Cang Mursyid menggratiskan bea sekolahnye malah sebulan sekali ngadain makan bersama. Yah, ade juge warge sekitar yang bantuin walaupun enggak rutin.

“Pegimane ngajar elu, Mat. Masing pake kurikulum 2013 ye? tanyenya sambil nglepusin asep lisongnye.

“Masing cang, pan udah tige semeter ngelaksanainnye. Kabarnye madrasah juge ngelanjutin kurtilas, cang. Cuman paroan begitu ya, pan bikin bingung guru ame muridnye ya, cang” timpal aye mulain ngoborlin kurtilas.

“Yaaaah, pejabatnye aje yang bodoh atawe gile, cuman di Indonesia yang kuikulumnya berantakan, yang kemenag lah pake digado-gado begitu, belon yang kemdiknas yang juga campuran ade yang kurtilas ade yang KTSP” mulain dah cang Mursyid ngumbar.

“Kabar madrasah rakyat, pegimane cang, ape masih jalan? aye cobe ngalihin omongan yang lebih bermanfaat daripade ngomongin kurikulum. Konpiyus!

“Nah, entu die Mat. Gue makin ga punye harapan sama pejabat-pejabat tuh. Elu bisa mikir kendiri dah. Pan pemerentah punya dana bantuan buat sekolahan swasta. Mustinya tuh bantuan dikasih buat sekolah-sekolah yang emang layak ngedapetin entu dana. Eh, malah yang dikasih sekolah-sekolah orang kaye, sekolahan yang duitnya udah karungan! Sekolah Al Karim tuh di seberang Cakung yang muridnye kalo dateng dianter mobil, malah bikin macet jalan, dikasih sama tuh pejabat. Belon lagi yang belah Lor, sekolah ape tuh namanya, yang ade bunyi Internasionalnye dikasih juge. Nah sekolahan gue yang udeh setahun ngajuin anggaran bareng SMA KOLOT, malah dicuekin. Bilangnye belom ade anggaran lah, belon ade persetujuan lah.

Cang Mursyid nampaknye menguras isi atinye. Maklum sih, emang bener begitu kenyataanye, katanye reformasi, tapi akhlaknye belon direformasi tuh para pejabat. Bener juge presiden ngusulin revolusi mental tuh!

“selidik punye selidik, ternyate tuh dua sekolahan dananye dipotong sampe 50%. Kurang ajar kan!” Kepalan tangan cang Mursyid ngegebrak meja. Kopi aye ampir tumpeh.

“Akhirnye waktu rapat koordinasi sama tuh para pejabat gue ungkapin dah masaleh tersebut. Biarin dah gue enggak dapet tapi caranye jangan maen belakang begitu. Ini pendidikan, Mat! Kalau masih diurus sama para penjahat model begitu ancur negare kita. Pendidikan itu nomor satu!” berapi-api cang Mursyid sampe orang-orang yang di warung ngeliatin. Heran, tapi mungkin membenarkan dalem ati.

“Cang, aye sih enggak nyalahin encang. Tapi emang faktanya masih banyak pejabat yang maen belakang begitu walaupum pemda udah ngasih aturan-aturan yang ketat. Namenye juge maling, cang!” timpal aye ngademin.

Ujan diluar masih belum reda. Udara dingin kayaknye enggak bisa ngalahin panasnye suasane ati cang Mursyid. Untuk membersihkan negeri ini terutama dunia pendidikan dari tikus-tikus korupsi emang susah, tapi aye yakin sedikit demi sedikit kalo rakyat peduli bahwa korupsi merusak tatanan akhlak bangsa dan kemajuan Indonesia, suatu saat nanti akan terkikis.

“Ah, udah deh Mat. Gue udeh capek ngomong bae tuh sama para pejabat! Munafik!” Cang Mursyid nutup obrolan, trus ngajak pulang nemuin cing Halimah yang katenye lagi meriang.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s